A UNED A Coruña, a través da extensión de Ferrol, acollerá, os días 18 e 19 de xaneiro de 2018 o curso "Violencia de Xénero Aspectos penais e protección civil".
Ana Rodríguez Piorno, licenciada en Dereito pola Universidade de Santiago de Compostela, xuíza interina dependente do Tribunal Superior de Xustiza de Galicia e profesora titora do Grao de Criminología no Centro UNED A Coruña, será a encargada de impartir a docencia. Actividade dirixida por Milagrosa María Ferrera López.
Ao longo das dúas sesións que comprende o curso, tratarase de identificar as situacións nas que se produce a violencia de xénero e a súa comprensión como un fenómeno estrutural. Abordaranse as ferramentas crave para o seu tratamento, as medidas eficaces de protección e rehabilitación das vítimas, así como os instrumentos necesarios para a súa prevención.
Está previsto o estudo pormenorizado e práctico do procedemento civil e do seu desenvolvemento en Xulgado de Violencia sobre a Muller.
Os detalles do programa contemplan os puntos: a tutela xudicial ante os xulgados, especialidades procesuais e medidas xudiciais de protección e seguridade á vítima.
O curso, de especial interese a membros de Forzas de Seguridade de Estado, está homologado pola Academia Galega de Seguridade Pública (AGASP).
Pódese seguir en liña e desde a aula de Ferrol e está certificado con 1 crédito ECTS e 2 créditos de libre configuración.
------------------------~()~-----------------------
Síguenos en: