O Centro UNED da Coruña está a organizar diferentes actividades ao redor do proxecto “A Saia Raíña”, realizado por Rita Más Ybáñez e que se celebrarán ao longo das próximas semanas. A primeira delas será a charla "A Saia Raíña: Mulleres enloitadas no século XXI", de carácter cultural e de acceso gratuíto, comezará ás 19:00h no salón de actos da sede da UNED da Coruña; aínda que tamén se pode seguir online, a través de streaming directo.
A conferencia baséase no traballo de investigación que Rita Máis Ybañez realizou sobre as mulleres que visten de loito na Galicia actual. Deste proxecto, xurdiron, como resultado, unha exposición itinerante e un audiovisual, que tamén se poderán visualizar a través das actividades organizadas pola UNED en colaboración co Centro Ágora da Coruña.
CONFERENCIA E AUDIOVISUAL:
“A SAIA RAIÑA” é unha exposición de testemuños, non é unha exposición fotográfica, nin unha exposición de videocreación. Así define a autora o traballo que presentará nesta conferencia, na que explicará as motivacións que lle levaron a realizar este proxecto e o longo camiño transcorrido ata que se materializou nunha exitosa exposición itinerante. Como ela mesma explica, o seu labor foi a de escoitar e mostrar; dar voz a quen non fose escoitada e mantivo un costume que, polo menos, desvela de novo unha desigualdade existente entre homes e mulleres, tanto no acceso á cultura, ás festas e participacións sociais, como no status persoal e mesmo no dereito de manifestar os seus sentimentos.
Durante a conferencia, a autora falará das súas informantes: mulleres para as que o loito ten un significado especial, formando parte da súa identidade, da súa cotidianidade, pero tamén das súas resistencias. Pois, como di, a autora “a dor axuda a superar a gran ausencia dos seres queridos, pero non é fácil entender como as avoas, tías, irmás, fillas e nais galegas eran criticadas cando rompían o costume de gardar loito para poder exercer a liberdade de elixir a cor nas súas vidas”.
As fotografías e gravacións que dan lugar á exposición e ao audiovisual deste proxecto foron recollidas entre 2006 e 2018 por distintas aldeas, municipios e cidades galegas das catro provincias.
A actividade terminará co visionado do audiovisual que dá título á charla no que se recollen os testemuños das mulleres.
EXPOSICIÓN E VISITAS GUIADAS:
A exposición pódese visitar no Centro Ágora (Lugar Gramela, 17- 15010 A Coruña) do 28 de febreiro ao 17 de abril e está organizada polo Concello da Coruña a través do Servizo Municipal de Bibliotecas. Desde o Centro UNED da Coruña están programadas dúas visitas guiadas, organizadas en colaboración co Centro Ágora da Coruña. Durante estas visitas, a autora explicará in situ o significado e historia que hai tras cada imaxe.
As visitas celebraranse os días 20 de marzo ás 12h e o 03 de abril ás 18h. Hai 20 prazas dispoñibles para cada unha delas, destinadas á poboación en xeral (aínda que se priorizará ao alumnado do Centro, profesorado e PAS). É necesaria a inscrición previa para poder asistir.
Rita Más Ybáñez é poeta, escritora, directora creativa de Papuxa comunicación, estudante de Antropoloxía social e cultural na UNED. Tamén colabora como redactora de prensa, locutora de radio, na produción de televisión e como directora creativa en axencias de publicidade. Fai recitais poéticos, imparte cursos e charlas sobre guión, deseño editorial e outras disciplinas en centros educativos e culturais de diferentes cidades. Ten formación en Antropoloxía visual (Círculo de Belas Artes, Madrid) e recibiu, entre outros o Premio Vídeo Poema Mirando ao mar (Concello de Carballo. Xunta de Galicia. Consellería de Pesca); Premio Foto Poema e Mural (Carballo, 2016); Premio nacional de poesía Jaime Gil de Biedma (La Nava, Segovia). Recentemente tamén gañou o premio da Concellería de Igualdade de Vigo con motivo do 8 de marzo e os seus carteis asolagaron a cidade.
Todas estas actividades, ademais, forman parte das actividades formativas complementarias da Programación especial con motivo do 8 de marzo, Día Internacional da Muller no Centro UNED A Coruña. Podes descargar o folleto informativo aquí.
INFORMACIÓN E MATRÍCULA NAS DISTINTAS ACTIVIDADES:
Máis información na Secretaría do Centro UNED da Coruña (rúa Educación, 3- 15011 A Coruña) no teléfono: 981 14 50 51 ou no correo electrónico: info@a-coruna.uned.es
>>Nota de Prensa<<
------------------------~()~-----------------------
Síguenos en: