Noventa alumnos dixeron adeus ao curso de verán celebrado no centro penal de Teixeiro
Tres intensas xornadas onde se reflexionou e debateu ao redor da reinserción e a reeducación.
O pasado venres 8 de xullo finalizou, nas instalacións do centro penal de Teixeiro, o curso de verán que organizou este Centro Asociado, "As novas vías de resinserción: módulos terapéuticos e módulos de respecto", coa asistencia de Germán Carro Fernández, director do centro universitario.
Ao redor de noventa inscritos tiveron a oportunidade de reflexionar ao redor da reinserción dos privados de liberdade e á reeducación; as ferramentas e mecanismos ao alcance as institucións, así como os fundamento legais, alicerces básicos que sustentan estes dereitos.
A formación pechouse coa visita dos cursillistas a un módulo terapéutico. Da man dos internos, fíxose un percorrido polas dependencias do edificio, aberto desde o 21 de marzo de 2006. "Trabállase co respecto á norma, a educación, o respecto", comentaba un dos internos, "todos velamos polo bo funcionamento do módulo". Unha dos obxectivos que máis valoran os internos do paso por este módulo é a recuperación da familia, "é un verdadeiro estímulo á reinserción, con resultados" -comentaban- "un constante reforzo positivo que nos fai sentir ben".
A estrutura e funcionamento interno do módulo é simple: os sesenta internos divídense en grupos de doce a dezaseis membros, encabezados por un encargado, que se responsabililiza do seu correcto mantemento. Trabállase baixo os principios de dous alicerces básicos: a educación; é necesario estudar polo menos ata o ensino básico, e os grupos de autoaxuda, para modificar condutas día a día.
Espazos comúns de Biblioteca, sala de reunións, espazos habilitados para talleres (pintura, marquetería, etc.) así como o exercicio físico, constitúen as ferramentas que fomentan as valoradas rutinas, conceptos polos que se esforzan e empregan parte do seu tempo.
------------------------~()~-----------------------
Síguenos en:
