A UNED cumpre unha función social que a leva un paso máis alá e a diferenza das demais. Estou convencido de que aquí, están os alumnos máis motivados e os mellor preparados"

José Carlos Varela, premio Consello Social 2014 e alumno da UNED A Coruña.

José Carlos Varela Peña, avogado en exercicio e profesor en CEUX, centro de estudos orientado á economía, a enxeñaría e á arquitectura, foi un dos alumnos do Centro Asociado UNED A Coruña, premiados pola súa excelente cualificación académica durante o curso 2012/2013.

Malia iniciar os seus estudos universitarios na UDC, a súa auténtica alma máter é a UNED, como así o testemuña a súa dilatada vinculación con esta entidade: licenciado en Economía no ano 2005, licenciado en Ciencias Físicas no ano 2006, obtivo o DEUSA no 2009, licenciouse en Dereito en 2012 e en Administración e Dirección de Empresas ao ano siguiente,2013. Simultaneou estes estudos co Máster en Mercados Bolsistas e Derivados Financeiros e co Máster para o Acceso á Avogacía que ofrece a UNED.

Actualmente continua a súa formación, xa que espera finalizar durante o presente curso os seus estudos de grao en matemáticas e en grao en Tecnoloxías Industriais. Ao mesmo tempo que se encontra realizando o doutorado en Economía dentro do programa DEcIDE, no que cooperan a Universidade de Murcia, a UNED, a Universidade de Alicante, a Universidade Miguel Hernández e a Universidade Politécnica de Cartagena.

A UNED acaba de publicar unha nova convocatoria dos Premios do Consello Social para este ano 2015, por este motivo non quixemos deixar pasar a ocasión de falar cos alumnos do Centro Asociado coruñés, que se premiou en anos anteriores.

José Carlos, durante o curso 2012-2013 aprobou na UNED un total de 33 materias, e durante o seguinte curso académico 2013-2014, superou 42 materias. É sen dúbida un digno merecedor deste premio e de moitos máis.

Á vista do teu percorrido académico, parece innegable a túa paixón pola aprendizaxe continua e a busca da mellora e excelencia profesional. Isto supón anos e tempo de estudo e dedicación. Imaxinábaste esta folla de ruta cando iniciaches os teus estudos universitarios?

"Non en absoluto. Nunca se me ocorrera que a estas alturas seguiría estudando; o que si podo dicir é que continuarei facéndoo, pois estou convencido que a excepción do tempo que dedico á miña familia, é o tempo que mellor investín."

Físicas, Dereito, ADÍA, Economía, ou mesmo Enxeñaría. Cales son as motivacións que te levaron a realizar cada unha delas?

"A física sempre me apaixonou, así que foi a miña primeira elección á hora de matricularme na UNED, pero tamén sentía curiosidade pola economía e a importancia que ten na nosa sociedade actual. Ao principio mesmo me matriculei con desconfianza, pensando en abandonar se non me gustaba, pero pouco a pouco fun decatándome da cantidade de información dispoñible que temos, e nestes momentos estou seguro de que todos e cada un dos estudos, e non só os universitarios, gardan os seus propios tesouros. É como ter á túa disposición o froito do esforzo acumulado de xeración tras xeración, esperando a que teñas o tempo e a paciencia para aproveitalo."

No teu testemuño con motivo do recoñecemento por parte do Consello Social da UNED nos premios do ano pasado, comentas que todo este esforzo "negou" tempo á túa outra gran paixón: a túa familia. No teu día a día xa modo de consello de experto a outros estudantes, como organizas a xestión do teu tempo de estudo?

"A xeito de experto non podo dar ningún consello, pero aceptaríaos encantado.

Hai tempadas nas que o traballo te desborda e non podes nin abrir un libro, aínda que teñas que enviar traballos ou facer Probas de Avaliación Continua. Ademais, se o discorrer do día a día xa é complicado de planificar, os fillos encárganse de proporcionarlle un extra de aleatoriedade, que xa fai da túa vida un caos impredicible, así que de ningún modo creo que poida presumir de organización. Si podo dicir que me parece unha boa idea facerse co material docente canto antes, que reducir os tempos mortos entre tarefas para a miña é clave, e sobre todo que hai que aguantar a presión cando chega o momento e manterse optimista.

Poñer os problemas en perspectiva sempre pode axudar, por moito que te organices, a vida imponse, e ao final é bo ter claro que estudar non é máis que unha das facetas que a enriquece.

En canto ao tempo, todos os que estudamos na UNED sabemos que as horas que lle dedicamos ao estudo van en detrimento doutras actividades. Seguramente case todos lle quitamos unha porción de tempo á nosa familia, ou aos nosos amigos, ou ás nosas afeccións. Por iso coñecemos a importancia da paciencia, tanto a nosa coma a dos demais."

A metodoloxía e formulación de estudo a distancia da UNED, así como a presencialidad e os servizos que ofrece o Centro Asociado na túa cidade, pensas que puideron axudarte como apoio durante a túa estanza como alumno e polo tanto para consecución dos teus obxectivos persoais e profesionais?

"Por suposto. A UNED está deseñada para achegar o coñecemento a xente que doutro modo o tería moi complicado, como é o meu propio caso e o de moitos outros. Pero non se pode pasar por alto que é unha metodoloxía dura, resúltame imposible non recoñecer o esforzo que fan moitos dos nosos compañeiros, investindo o seu tempo, o seu diñeiro e a súa ilusión en mellorar a súa formación.

Persoalmente non podo comparar a UNED co resto de universidades. Considero que a UNED cumpre unha función social que a leva un paso máis alá e a diferenza das demais. Estou convencido de que aquí están os alumnos máis motivados e os mellor preparados, e dígoo baseándome en que aquí adoita ser o alumno o que custea os seus propios estudos, e en que moitos deses alumnos xa están en posesión dun ou varios títulos universitarios. Así que non creo que se trate só de obter unha titulación, creo que se trata de proporcionar oportunidades de formación, de posibilitar o enriquecemento cultural, de permitir a quen traballa a opción de estudar sen modificar o seu horario laboral, de poder estudar e seguir gozando da túa familia, de estudar na casa sen necesidade de desprazarte a diario, etc. Supongo que os casos son demasiado diversos como para pretender abranguer todas as posibilidades, pero algo ten claro e é que as cifras desta universidade son demoledoras: máis de 250.000 alumnos matriculados nun momento como o actual, para min é un referente de éxito que o di todo, e é que se algo temos en común os estudantes son as ganas de aprender e a experiencia do que custa."

Por último, se puideses definir a túa experiencia académica na UNED en dous, tres palabras, cales serían?

Coñecemento e oportunidades.

Información sobre os Premios do Consello Social 2015 aquí.

------------------------~()~-----------------------

Síguenos en Facebook.