Realicei os meus estudos de Psicoloxía na Universidade de Santiago de Compostela. Ao ano seguinte decidín cursar a Diplomatura de Educación Social na UNED, compatibilizándoo co meu traballo nos servizos sociais dun concello. Posteriormente, orientei o meu labor cara ao sector da terceira idade, traballando en diversas residencias como psicóloga, e continuando coa miña formación para ampliar o meu perfil profesional.
Por que decidiches realizar o Máster na UNED?
Tiven un breve contacto co sector da educación, e por iso que me decidín a realizar o Máster en Formación do Profesorado, especialidade orientación educativa. A idea principal é ampliar a miña formación, de maneira que me permita traballar nun maior número de ámbitos.
Título do TFM
"Programa para mellorar a competencia social en adolescentes con Trastorno de Déficit de Atención con Hiperactividade".
Cales foron os obxectivos iniciais na túa liña de investigación?
Á hora de formular o meu programa, establecín unha serie de obxectivos a alcanzar coa implementación deste, e que abranguesen diferentes ámbitos da vida do alumno. Como obxectivos específicos, neste traballo de investigación formulouse:
Unha vez finalizado e vistas as conclusións, que é o que resaltarías do traballo?
O meu traballo é eminentemente práctico, e implica a participación de todos os axentes educativos, tanto a nivel de escola coma a nivel externo. O alumno ten un papel principal na consecución dos obxectivos, reflexionando sobre a súa conduta e as actuacións que pode levar a cabo para reconducila.
Creo que o máis relevante do proxecto é que supón a actuación directa sobre un problema moi importante que se aprecia nas relacións sociais das persoas con TDAH, e que implica unha limitación na súa vida cotiá á hora de interaccionar cos demais, sentíndose en ocasións rexeitadas polo seu ámbito debido á súa conduta.
Investigouse moito máis sobre o tema?
O tema foi e é amplamente estudado, tanto a nivel teórico como práctico. Isto facilitou o meu labor, pois me permitiu poder consultar unha ampla bibliografía.
Que achega o teu traballo como novidade ao campo de estudo?
O traballo constitúe un punto de vista máis a engadir aos xa existentes sobre o tema, resaltando o seu enfoque eminentemente práctico e o feito de que actúa sobre diferentes dimensións da vida dos adolescentes. Ademais, ten en conta o funcionamento do instituto para implementar o programa sen que afecte de xeito importante ao funcionamento ordinario deste.
Dirías, á vista das conclusións, que é viable a súa implementación, se fose o caso? En que contextos?
É un programa claramente aplicable, se ben na actualidade sería máis difícil debido á conxuntura que está a vivir o sector educativo, con constantes recortes e temporalidade dos profesionais. A implementación do programa exposto no meu TFM implica unha continuidade dos traballadores, xa que os seus resultados se enxergan máis a longo prazo. O continuo trasfego de persoal restaría efectividade ás actuacións levadas a cabo.
Implantaríase no contexto escolar principalmente, se ben tamén se actuaría de forma directa coa súa familia, orientándoa nas súas actuacións co adolescente.
É a primeira vez que realizas un traballo de investigación? Como resultou a experiencia?
Na universidade xa realicei traballos para diferentes materias, pero nunca de tanta envergadura e profundidade como neste caso. Resultoume unha experiencia ardua, se ben tiven oportunidade de adquirir moitos coñecementos e reflexionar sobre un tema como este, de grande actualidade. Por último, destacar a alta implicación da miña profesora titora, facendo puntualizacións no meu traballo para melloralo e alentándome a continuar. Estivo sempre dispoñible para resolver as miñas dúbidas, canalizando o meu traballo cara ao camiño correcto.