"O procedemento é absolutamente garantista e, en principio, perfectamente válido no seu funcionamento"

Ana Rodríguez Piorno fala sobre o Procedemento Abreviado, tema do seu último curso na Aula de Ferrol.

Ana Rodríguez Piorno dedícase ao exercicio da función xurisdicional de xeito ininterrompido dende 2001, constituíndo a referencia do seu último destino o Xulgado de Instrución Número Tres de Santiago de Compostela, en funcións de reforzo e en exclusiva no Xulgado de Violencia sobre a Muller.

Ademais de participar en numerosas xornadas en relación coas reformas procesuais máis relevantes durante o tempo que leva desenvolvendo a función xurisdicional anteriormente referida, con intervención de relatorio activo nas mesmas, veu impartindo charlas de formación en distintos colexios profesionais dirixidas aos operadores xurídicos relacionados coa violencia de xénero, sendo colaboradora da Escola de Práctica Xurídica de Santiago de Compostela, con exercicio de funcións de titora co grupo de alumnos asignado en cada caso, cos que compartiu diariamente tarefas xudiciais, e da Escola de Práctica Xurídica da Coruña, despois de impartir clases na área de Dereito Civil.

Desenvolveu actividade docente na UNED durante os últimos tres anos. Hai uns días, tivo a oportunidade de clausurar o curso "Procedemento Abreviado. Introdución e obxectivos", na Aula de Ferrol, actividade formativa á que estaban matriculados, algo máis de 90 alumnos, nas modalidades de presencialidade e online.

Que diferencia un procedemento abreviado e un procedemento ordinario?

"O procedemento penal abreviado é unha modalidade abreviada do procedimento penal ordinario a través do cal se busca a rapidez e a simplificación de actuacións, unha premisa que se manifesta en todas e cada unha das partes do proceso.

Dado o ámbito de aplicación do procedemento penal abreviado, é dicir, os delitos aos que se aplica, determinados pola súa sanción, configúrase como o de maior utilización. Por iso, hai que entendelo como unha modalidade abreviada do procedemento penal ordinario, que queda de aplicación para delitos de especial gravidade,".

Que beneficios destacaría da aplicación deste procedemento no ámbito xudicial?

"Basicamente, que alixeira o proceso penal de actuacións inútiles, evitando a repetición das que se realizasen coa asistencia de avogado, ademais do cal supón un extraordinario fortalecemento das garantías do imputado e da protección das vítimas do delito, con manifestación desta última, fundamentalmente, no establecemento dun sistema de notificación aos ofendidos e aos prexudicados, mesmo cando non comparecesen nas actuacións, que poden constituírse en parte sen necesidade de formular querela.

Ademais, introduce a posibilidade de celebrar o xuízo en ausencia do acusado en causas por delitos non graves, en condicións que garanten o dereito de defensa do ausente mediante a intervención do seu avogado e a través do dereito de interpoñer recurso de anulación contra a sentenza ditada en ausencia".

En que ano se pon en marcha o procedemento abreviado en España e para que xurisdición ou xurisdicións?

"O procedemento penal abreviado foi introducido a través da Lei orgánica 7/88, do 28 de decembro, co propósito de adecuar a organización xudicial española na orde penal á esixencia do xuíz imparcial, e iso mediante a unificación dos tres procedementos ata entón existentes para delitos menos graves. A Ley 38/2002 modificou determinados aspectos da súa regulación xeral co fin de superar os inconvenientes revelados ao longo dos máis de 13 anos de vixencia

A súa aplicación concéntrase na xurisdición penal".

Cales son os delitos que se xulgan mediante o procedemento abreviado?

"O ámbito procedemento penal abreviado circunscríbese ao axuizamento de todos aqueles delitos castigados con pena privativa de liberdade non superior a nove anos, ou ben con calquera outras penas de distinta natureza, ben sexa únicas, conxuntas ou alternativas, calquera que sexa a súa contía e duración. Quedan exceptuados da órbita do procedemento abreviado os delitos que integran o ámbito de aplicación do procedemento para o axuizamento rápido de determinados delitos".

Na súa opinión, é un procedemento mellorable?

"O procedemento é absolutamente garantista e, en principio, perfectamente válido no seu funcionamento.

Entendo que a mellora deste debe pasar, necesariamente, polo alixeiramento da carga de traballo dos xulgados de instrución, e el por canto que o principal obstáculo para a súa tramitación áxil está constituído, precisamente, por tal premisa".

------------------------~()~-----------------------

Síguenos en Facebook.