"Os beneficios que achega o SEO a unha empresa, están directamente relacionados coa consecución dos seus obxectivos empresariais"

Óscar Álvarez Silva imparte o curso de "Posicionamento local de Pemes en buscadores" que comeza o venres 17 de abril, e cóntanos algúns dos segredos que rodean un bo SEO.

O próximo venres 17 de abril comeza o curso "Posicionamento Local de Pemes en buscadores", impartido por Óscar Álvarez Silva na sede da UNED A Coruña. Como adianto esta actividade formativa, pedímoslle ao seu relator que revelase algunha das cuestións fundamentais que rodean ó SEO, principal protagonista e responsable na batalla da búsqueda de nichos e dun mellor posicionamento de marcas en buscadores.

Álvarez Silva é Graduado en Economía pola Universidade Nacional de Educación a Distancia (UNED), Analista de datos pola University of British Columbia (UBC. Postgraduated in Digital Analytics) e Experto en Negocio Intelligence pola University of California, Irvine (UCI. Postgraduated in Business Intelligence). Membro da Dixital Analytics Association (DAA), desenvolve a súa carreira profesional dentro do ámbito da Análise de Datos, Competencia estratéxica e Consultoría de Mercadotecnia orientados á consecución de obxectivos empresariais.

A que se dedica un SEO e que beneficios achega a unha empresa?

"Un SEO dedícase fundamentalmente a posicionar proxectos web nos primeiros postos dos rankings dos buscadores. É unha profesión en auxe debido á necesidade que teñen as empresas de gañar visibilidade en internet e poder así chegar aos seus potenciais clientes cando estes mostran interese por un tema concreto relacionado cos produtos ou servizos ofertados polas devanditas empresas. Os beneficios que achega a unha empresa están directamente relacionados coa consecución dos seus obxectivos empresariais, xa sexa vender un produto ou ofertar un determinado servizo, xa que grazas ao incremento da súa visibilidade nos buscadores, os usuarios poderán acceder directamente aos seus produtos ou servizos, podendo ampliar considerablemente a súa carteira de clientes,".

Que calidades e aptitudes debe ter un bo SEO?

"A calidade principal que debe ter un bo SEO é a capacidade analítica para poder realizar accións concretas orientadas a mellorar a visibilidade nos buscadores de cada proxecto sobre a base dos datos, coñecer os factores de posicionamento que establecen os propios buscadores sabendo analizar correctamente o mercado no que opera a empresa que vai xestionar así como unha correcta interpretación da competencia mellor posicionada nos rankings para un mesmo nicho de mercado. Un SEO debe ademais saber adaptarse aos continuos cambios que se producen ao longo do ano no propio algoritmo que definen os criterios de relevancia para establecer as posicións nos buscadores e poder aplicalos eficientemente a cada proxecto".

Google realiza con frecuencia cambios no sistema e na estrutura que obrigan a readaptar o traballo dos SEO. Como se pode minimizar o impacto negativo destes cambios?

"Un impacto negativo nos resultados debido ao cambio no propio algoritmo que establece a importancia relativa dos factores de posicionamento debe corrixirse centrando os esforzos de posicionamento na análise e a corrección de cada un dos elementos de nova incorporación e a súa importancia relativa en relación aos esforzos globais de posicionamento que se están a realizar en cada proxecto web. Tamén é importante seguir de preto os cambios que se están a producir nas posicións da nosa competencia para poder dar un valor concreto a cada acción que realicemos. Se un determinado proxecto web tivo cambios significativos nas súas posicións despois dunha actualización do algoritmo de posicionamento normalmente é debido a unha mala xestión do posicionamento previa a eses cambios, xa que os cambios ademais de premiar determinadas accións orientadas fundamentalmente a mellorar a experiencia de usuario e a relevancia dos resultados das buscas, tamén penalizan prácticas de posicionamento realizadas co fin de gañar posicións de xeito rápido".

Cal é a relación actual entre SEO e Social Media? Diferéncianse ou compleméntanse?

Un dos factores de posicionamento máis importantes e que toman como referencia os buscadores para determinar os seus rankings en buscas orgánicas é a relevancia. Neste sentido, a relación das empresas cos seus clientes a través das redes sociais é un indicador para os buscadores de como somos vistos polos nosos clientes e polo tanto un factor que determina a nosa relevancia como empresa. A pesar de haber certa controversia debido á importancia que poden chegar a ter as redes sociais e se as empresas deben dedicar máis esforzos a estas ou ao SEO, ambos os dous compleméntanse e non deberan ser analizados de xeito individual, xa que unha boa estratexia de posicionamento fará que gañemos máis seguidores para as nosas redes sociais e unha boa estratexia de contidos en redes sociais derivará tráfico á nosa web e axudará tamén a dar sinais positivos sobre a relevancia da nosa empresa".

Cal foi a evolución natural dun SEO nos seus inicios ata hoxe?

"Fundamentalmente a adaptación aos novos requirimentos dos buscadores que fan que a aprendizaxe do profesional deba estar nun proceso de adaptación continuado. Nos inicios, os SEO cunha boa estrutura de enlaces web dende páxinas con relevancia alta cara á da páxina que se quería posicionar, constituían un indicador en moitas ocasións suficiente para poder posicionar correctamente unha web. Na actualidade, coñécense máis de 200 factores de posicionamento que interveñen directamente nos rankings dos buscadores, e estes son só aqueles que coñecemos, xa que os buscadores non proporcionan unha lista completa de factores e a súa importancia relativa por querer evitar resultados non naturais nas buscas dos usuarios. Debido a iso, un SEO debe estar sempre en proceso de investigación e adaptación da súa metodoloxía de traballo".

Por último a pregunta do millón, cal é o truco ou trucos para posicionar unha web nos primeiros postos?

Considero que o fundamental para posicionar un proxecto web é a análise e a investigación daqueles factores que interveñen directamente nos resultados de busca para poder establecer un proceso de traballo adaptado a cada proxecto. Unha boa práctica común a todo proxecto sería analizar os elementos que interveñen na usabilidade dunha web e unha análise da competencia posicionada nos primeiros postos. O mellor truco sempre é pensar como cliente".

Accede ó curso aquí.

------------------------~()~-----------------------

Síguenos en Facebook.