"Quedo coa satisfacción de rematala"

4 de noviembre de 2015

Alejandro López Rodríguez, licenciado en ADE.

Alejandro López Rodríguez licenciouse en Ciencias Económicas e Empresariais pola Universidade de Santiago de Compostela no ano 1998. Máster en Auditoria de Contas na mesma Universidade, volveu a licenciarse este curso pasado en ADE, nesta universidade. Responsable de departamentos de contabilidade e fiscal en diferentes asesorías desde setembro do 2000 ata xuño de 2007. Director financeiro na sociedade Ron Curiel S.L. desde xuño de 2007, ata a actualidade e director financeiro tamén de Gut & Schnell S.L. desde maio de 2015 ata a actualidade.

Por que decidiches realizar unha Licenciatura na UNED?

"Para actualizar e ampliar coñecementos, fundamentalmente en materias relacionadas coa contabilidade, que quedan algo orfas na licenciatura de Económicas".

Cales foron os obxectivos iniciais cando te matriculaches por primeira vez? Persoais ou profesionais?

"Ambos, como dixen xa, para a actualización e ampliación de coñecementos en determinadas materias relacionadas coa miña anterior licenciatura, moitos dos cales son de aplicación e utilidade no meu traballo como director financeiro".

Como describirías o proceso nestes anos de estudo? Sentes que como estudante tiveches unha evolución na túa forma e tempo de traballo e de estudo desde os inicios?

"Tratando de conciliar a familia, o traballo e os estudos. Algúns momentos de maior intensidade no estudo, pero realmente leveino bastante ben. Quizais agora logrei unha maior comprensión das materias de estudo que cando empecei a miña primeira carreira a principios dos anos 90, entendo que o traballo que realizo tamén influíu nisto".

Na túa opinión e no plano profesional, que che vai achegar esta titulación a curto e medio prazo?

"Ademais do comentado, non teño claro o que me poida achegar no futuro, xa que creo que a experiencia profesional é máis importante neste aspecto, quedo coa satisfacción de finalizala".

Como viviu a túa contorna estes anos de estudo? Tiveches que sacrificar tempo, renuncias...?

"Leveino bastante ben, o feito de desenvolver a miña carreira profesional como director financeiro fai que este bastante familiarizado con gran parte das materias que tiven que estudar, o que me permitiu non sacrificar demasiado tempo".

Un pequeno xogo: tres adxectivos positivos e tres negativos do teu paso por esta universidade.

"Positivos: enriquecedor, satisfactorio e proveitoso; negativos: ningún".

Anímasche a seguir estudando?

"Quizais idiomas".