"As empresas e a industria actualmente demandan enxeñeiros cunha sólida formación técnica que ademais sexan capaces de traballar de forma autónoma e en contornas de colaboración con outros profesionais"
José Carpio, catedrático e director da Escola de Enxeñeiros Industrales na UNED. Director das Xornadas de Enxeñería Industrial que comezan o 12 de abril.
O Centro Asociado UNED A Coruña acollerá, os próximos 12 e 19 de abril, as Xornadas de Enxeñería Industrial da UNED. Actividade continuación das celebradas en cursos anteriores en Madrid e Palma de Mallorca, programada en dúas sesións; o martes 12 de abril no Centro Asociado e o seguinte martes, 19 de abril, nas instalacións da empresa petroquímica Air Liquide.
Certificarase 0.5 créditos ECTS e 1 crédito de libre configuración e poderá seguirse de forma presencial ou vía streaming.
Estas Xornadas están dirixidas a estudantes de Enxeñería da UNED e outras universidades, a interesados en estudar esta disciplina de prestixio e demanda laboral a través do Grao oficial, ou enxeñeiros en activo que queiran compartir experiencias e vivencias profesionais nun foro aberto, e participativo.
Á fronte destas Xornadas estará José Carpio Ibáñez. Enxeñeiro Industrial e doutor Enxeñeiro Industrial pola Universidade Politécnica de Madrid (UPM). A súa carreira docente transcorre en distintas universidades españolas. Na UPM, na Universidade de Cádiz e, principalmente, na UNED, onde se desenvolveu na área de Enxeñería Eléctrica. É Catedrático deste campo na ETS de Enxeñeiros Industriais da Universidade Nacional de Educación a Distancia (UNED).
As súas principais liñas de investigación céntranse en diferentes aspectos dos sistemas e as instalacións eléctricas, así como na aplicación á educación das novas tecnoloxías da información e a comunicación. Durante os seus case trinta anos como docente, dirixiu quince teses doutorais, publicado máis de vinte artigos en revistas internacionais indexadas e sempre mantivo unha relación de colaboración e traballo co mundo industrial. É membro de distintas organizacións e asociacións profesionais, entre elas o Colexio Oficial de Enxeñeiros Industriais de Madrid.
Actualmente, desde novembro de 2013, é Director da E.T.S. de Enxeñeiros Industriais da UNED.
O próximo 12 de abril está prevista a celebración das primeiras Xornadas de Enxeñería Industrial no Centro Asociado UNED A Coruña. Cales son os obxectivos destas Xornadas?
"O primeiro obxectivo é ofrecer aos nosos estudantes unha visión da profesión de Enxeñeiro Industrial, unha profesión que ten atribucións profesionais recoñecidas por lei e que está amplamente aceptada, recoñecida e demandada pola sociedade. Para iso contamos coa participación do Ilustre Colexio Oficial de Enxeñeiros Industriais de Galicia e de antigos alumnos de Enxeñería Industrial, hoxe xa enxeñeiros, que a estudaron na UNED. O segundo obxectivo é animar aos nosos estudantes na súa tarefa diaria para que sigan no seu labor de realizar estes estudos e de facelo pola UNED. Para este obxectivo contamos coa experiencia e opinión deses antigos alumnos que terminaron na UNED e que hoxe en día están a traballar como enxeñeiros en empresas relevantes".
Na súa opinión e tomando como referencia anteriores Xornadas celebradas en Madrid e Palma de Mallorca, cal é a motivación principal dos asistentes a estas Xornadas? Cal é o perfil do matriculado a esta actividade?
"Entendo que a motivación é ese interese innato que temos os enxeñeiros por coñecer e estar ao día. Neste caso é coñecer a profesión, coñecer que vantaxes ofrece, como estudante e logo como enxeñeiro, o feito de estar colexiado e coñecer as experiencias de enxeñeiros que uns anos antes estiveron como eles estudando Enxeñería Industrial pola UNED. Esperamos contar coa asistencia dos estudantes de Enxeñería Industrial da UNED do noso Centro Asociado da Coruña e, posiblemente, tamén dos outros tres centros da UNED en Galicia, ademais de estudantes desta carreira que o fan nas demais universidades galegas. E porqué non, de estudantes dos últimos cursos de bacharelato que se estean a comezar algún Grao de Enxeñería Industrial. Queremos que sexan unhas Xornadas de portas abertas para coñecer a realidade da nosa profesión de Enxeñeiro Industrial".
No programa participan representantes do ámbito académico, institucional, empresarial, e unha representación do alumnado. Quixeron ofrecer unha visión 360º da profesión. É así?
"Efectivamente e por iso desde a ETS de Enxeñeiros Industriais da UNED queremos agradecer a colaboración do Centro Asociado da Coruña, do Colexio Oficial de Enxeñeiros Industriais de Galicia e da súa Delegación na Coruña, da empresa Air Liquide, cuxas instalacións en Sabón visitaremos dentro destas Xornadas, e dos nosos antigos estudantes que nos contarán a súa experiencia persoal primeiro como estudantes da UNED e agora xa como Enxeñeiros".
Durante a primeira sesión das Xornadas, está previsto falar da profesión do enxeñeiro industrial, experiencias? Poderíanos dicir, na súa opinión, que diferenza a este profesional. Dito doutro xeito, que aptitudes e competencias necesita ter un enxeñeiro industrial para desempeñar con eficacia o seu traballo?
"A profesión de Enxeñeiro Industrial ten por lei recoñecidas atribucións profesionais no ámbito da realización e dirección de proxectos industriais, atribucións que se desenvolven a través dos Colexios profesionais, de aí a importancia de contar nesta Xornada coa participación do Colexio Oficial de Enxeñeiros Industriais de Galicia. As empresas e a industria actualmente demandan enxeñeiros cunha sólida formación técnica que ademais sexan capaces de traballar de forma autónoma e en contornas de colaboración con outros profesionais, non só enxeñeiros como eles, e de facelo cunha visión internacional, de aí a importancia dos idiomas, especialmente o inglés. E na UNED ofrecemos esa formación".
En novembro de 2013 tomou posesión do cargo de director da Escola de Enxeñeiros Industriais da UNED. Como valora esta etapa?
"A pesar do traballo extra que me supón, xa que o ser Director da Escola non me descargou dos meus deberes docentes e de investigación, valoro de forma moi positiva este labor de xestión universitaria, é a miña Escola e a miña universidade, na que levo vinte e catro anos. E ademais permíteme participar representando aos meus compañeiros, os demais profesores da ETS de Enxeñeiros Industriais da UNED, en actos como esta Xornada nos que se concentran de forma tan perfecta as visións da formación universitaria e do exercicio da profesión, isto é, esa relación entre a Universidade e a Empresa que a sociedade constantemente demándanos. Por iso desexo agradecer unha vez máis ao Centro Asociado da UNED na Coruña a súa invitación e a organización destas Xornadas".
Fonte imaxe: Comunicación UNED.
------------------------~()~-----------------------
Síguenos en:
