"Sen dúbida na UNED aprendes moito. Ademais de estudar tes que saber xestionar o teu tempo autónomamente e marcar os teus obxectivos para conseguir"
María Teresa Romero, Grao en Dereito, curso 2016/2017.
María Teresa Romero Caamaño é graduada en Relación Laborais e Recursos Humanos pola Universidade de Santiago de Compostela. Durante o curso 2016/2017 graduouse en Dereito pola UNED.
Por que decidiches realizar o Grao en Dereito na UNED?
"Decidín facer o Grao en Dereito na UNED porque cando realicei as prácticas do Grao en Relacións Laborais e Recursos Humanos nun despacho de avogados en Santiago de Compostela apaixonábame moito o tema xurídico e co Grao que cursara só podía levar a parte social. Como me quedou esa espinita cravada aventureime en setembro de 2013 con Dereito e a verdade é que volvería repetilo unha e mil veces".
Cales foron os obxectivos iniciais cando te matriculaches por primeira vez? Persoais ou profesionais?
"Cando me matriculei os meus obxectivos debatíanse por unha banda a profesión gustábame e polo outro á necesidade persoal de seguir formándome, son das que pensa que a formación é ouro. O Grao que acabo de finalizar conseguiu unificalos".
Como describirías o proceso nestes anos de estudo? Sentes que como estudante tiveches unha evolución na túa forma e tempo de traballo e de estudo desde os inicios?
"O proceso foi un camiño bastante duro, pero con moita aprendizaxe. Todos os días que estudaba aprendía cousas novas e vía avance na miña formación persoal. Como estudante podo dicir que vivín en propia pel un Grao presencial e un Grao a distancia. Sen dúbida na UNED aprendes moito. Ademais de estudar tes que saber xestionar o teu tempo autónomamente e marcar os teus obxectivos para conseguir.
Nas carreiras presenciais tes contacto directo con profesores e compañeiros, así que todo é máis fácil xa que che van explicando e avanzando o temario aos poucos para estudar; pero nas carreiras a distancia o reto é moito máis grande porque ao non ter que ir a clase a xente cre que non tes que estudar, e realmente pasas moitas máis horas estudando.
Recordo que cando empecei non sabía nin como estudar porque vía eses manuais inmensos e parecía que febreiro estaba tan lonxe de outubro. Aquel primeiro cuadrimestre pensei que non sería capaz de aprobar ningunha materia porque me atopaba perdida. Tentaba compatibilizar a miña vida social e a miña vida de estudante, pero as horas pasábanseme voando sen avanzar no temario. Con todo, durante os catro anos seguintes fun aprendendo a xestionar o meu tempo de estudo e mellorando os meus métodos".
Na túa opinión e no plano profesional, que che vai achegar esta titulación a curto e medio prazo?
"Na miña humilde opinión creo que no plano profesional esta titulación vai achegar a longo prazo un bo futuro. Os meus plans son facer o Máster en acceso á Avogacía para poder traballar por esa rama, aínda que nunca se sabe o que vai pasar".
Como viviu a túa contorna estes anos de estudo? Tiveches que sacrificar tempo, renuncias...?
"Renunciei a festas, tempo de deporte e lecer. Nestes anos de estudo os meus achegados compartiron comigo moitos momentos de nervios e noites en vela. Sempre agradecerei á miña familia e amigos o seu apoio, en parte fixeron que todo resultase bastante máis fácil. Iso xunto co meu cabezonería fai que hoxe en día sexa xa graduada en dereito".
Un pequeno xogo: tres adxectivos positivos e tres non tan positivos do teu paso por esta universidade.
"Os tres adxectivos positivos: construtivo, satisfactorio e dinámico. Os tres adxectivos negativos: laborioso, esixente e duro".
Que cambios pensas que necesita a UNED?
"A grandes liñas non cambiaría nada. Hai pequenos detalles que se poderían mellorar por exemplo os exames a partir das 9 da mañá porque ás veces a xente fala de que teñen dúas horas ou máis de camiño e no inverno é un pouco complicado, pero a gusto de todos nunca pode estar. En canto aos estudos só tentaría cambiar o tema de manuais en papel por bibliografía dixitalizada; por economía e polo coidado do medioambiente.
Anímaste a seguir estudando?
Si, xa estou aventurada na miña terceira titulación, estou a cursar o Grao en Administración e Dirección de Empresas pola UNED novamente, e ao mesmo tempo compatibilizándoo co Máster en acceso á Avogacía na mesma universidade. As ganas de aprender sóbranme e espero realizar a miña actividade profesional no campo da avogacía, o que leva unha continua aprendizaxe".
----------------------------{}---------------------------
Síguenos en:
