Encontro sobre "As mulleres nas Forzas Armadas"
Actividade gratuíta incluída na programación do Día Internacional da Muller do Centro da Coruña que se celebrará o vindeiro xoves 07 de marzo nas modalidades presencial e en liña (streaming directo)
En 2018 cumpríronse 30 anos da incorporación das mulleres ás Forzas Armadas (FAS) en España, pasando de ser 27 a case 15.000 na actualidade. Neste tempo, desenvolvéronse unha serie de medidas e normativas derivadas da presenza das mulleres, concibidas para fomentar a igualdade de xénero nas FAS. Son de destacar as medidas lexislativas fronte ao acoso e as relativas a adecuar a conciliación familiar, persoal e profesional, nas que se deu especial relevancia á maternidade e a todo o relacionado con ela.
Neste encontro, catro mulleres, profesionais dos diferentes corpos das FAS, expoñerán todas estas cuestións, profundarán nas diferentes medidas levadas a cabo e achegarán as súas experiencias persoais e profesionais, nun encontro aberto a todo o alumnado da UNED e ao público en xeral.
A capitá psicóloga Ángela Díaz del Río Lago será a encargada de conducir o encontro e, ademais, de introducir sobre os datos actuais da incorporación da muller nas FAS. Posteriormente, a tenente Vanesa Carballido Gómez, da Escala de Oficiais do Exército do Aire, falará da adecuación lexislativa á tolerancia cero fronte ao acoso. Seguidamente, a sarxento 1º Sonia Martínez Rodríguez, da Escala de Suboficiais da Armada, presentará as cuestións relativas á muller en operacións: vida a bordo dun buque de guerra. Finalmente, a cabo Yolanda María Gestal Paseiro, da Escala de Tropa do Exército de Terra, falará da conciliación da vida familiar, persoal e profesional. Tras as intervencións das catro relatoras, abrirase a quenda de preguntas nas que poderá participar o público asistente.
A finalidade desta actividade é dar a coñecer a experiencia das mulleres nas Forzas Armadas a través dunha visión persoal e profesional nas distintas especialidades, analizar a evolución da presenza das mulleres nas FAS tras 30 anos da súa incorporación e expoñer as principais cuestións relacionadas coa presenza diferenciada de xénero que afectan as mulleres nas Forzas Armadas. 
A actividade celebrarase o próximo 07 de marzo ás 18:30 h no salón de actos da sede da UNED da Coruña, aínda que pode seguir tamén online en directo a través de streaming; para iso é necesario inscribirse na actividade. Podes inscribirte aquí.
O encontro sobre "As mulleres nas Forzas Armadas" inscríbese na programación especial do Centro UNED A Coruña en torno ao 8 de marzo, Día Internacional da Muller. Podes consultar o tríptico informativo sobre a programación do Centro aquí.
Máis información no servizo de secretaría do Centro UNED A Coruña (rúa Educación, 3 – 15011 A Coruña), no teléfono: 981 14 50 51 ou no correo electrónico: info@a-coruna.uned.es
----------------------------{}---------------------------
Síguenos en:
