Felix Fraguela Santos é membro das Forzas e Corpos de Seguridade desde o ano 1993. Este ano licenciouse en Dereito na UNED.
Por que decidiches realizar os teus estudos de Dereito na UNED?
"Pola posibilidade de realizar os estudos a distancia, xa que polo meu traballo e responsabilidades familiares facíanme imposible facelo presencialmente".
Cales foron os obxectivos iniciais cando te matriculaches por primeira vez? Persoais ou profesionais?
"Por unha cuestión persoal, aínda que a nivel profesional tamén me resultaba proveitoso".
Como describirías o proceso nestes anos de estudo? Sentes que como estudante tiveches unha evolución na túa forma e tempo de traballo e de estudo desde os inicios?
"Foi un proceso progresivo -de menos a máis-. A medida que ía adquirindo coñecementos e superando materias víame máis capacitado para afrontar un maior número delas. Este último ano matriculeime de 12 materias, cando no meu primeiro ano só o facía de 3".
Na túa opinión e no plano profesional, que che vai achegar esta titulación a curto e medio prazo?
"A curto prazo axúdame a ter unha maior confianza no meu labor diario. A medio prazo ábreme posibilidades para ascender no meu traballo, así como a opción dun cambio de rumbo profesional e dedicarme a labores específicos do Dereito".
Como viviu a túa contorna estes anos de estudo? Tiveches que sacrificar tempo, renuncias...?
"Podo dicir que en todo momento sentín arroupado por toda a familia e sen o apoio deles creo que xamais o conseguiu.
No plano persoal tiven que sacrificar días das miñas vacacións e do meu tempo libre, aínda que eu non o considerei como tal. Creo que o maior sacrificio fixérono a miña muller e os meus fillos, pero especialmente a miña muller xa que é a que directamente se vió afectada da miña dedicación aos estudos".
Un pequeno xogo: tres aspectos positivos e tres non tan positivos do teu paso por esta universidade.
"Positivos: responsable, flexible e dinámica. Negativos: distante, solitaria e ardua".
Anímasche a seguir estudando?
"Por suposto, aínda que será o ano que vén. Estou a dubidar entre o grao en Ciencias Xurídicas, en Psicoloxía ou estudar algún idioma".
----------------------------{}---------------------------
Síguenos en: