"A xustiza non é gratuíta porque se financia con tributos de todos os cidadáns"

Miguel Lorenzo, concelleiro de Servizos Sociais do Concello da Coruña participou no curso de verán celebrado da UNED A Coruña, Existe un dereito fundamental á xustiza gratuíta? ".

Miguel Lorenzo Torres participou no curso de verán organizado polo centro asociado da UNED na Coruña, " Existe un dereito fundamental á xustiza gratuíta? " que se celebrou no centro penitenciario de Teixeiro.

Avogado en exercicio dende o ano 1986 e especializado en Dereito Civil e Mercantil é membro da xunta de goberno do Colexio de Avogados da Coruña igualmente é membro do consello reitor da Escola de Práctica Xurídica da Coruña.

Desempeño funcións docentes de profesor asociado na Escola Universitaria de Relacións Laborais dende o ano 1988, e na Escola de Turismo da Coruña durante os cursos 91/92 a 94/95 (ambos os dous inclusive). Docente tamén na Escola de Práctica Xurídica do. Colexio de Avogados da Coruña, na Área de Dereito Civil, dende o ano 1994 a 2008.

Lorenzo é concelleiro no Concello da Coruña dende o ano 2007 e actualmente é o responsable da área de Servizos Sociais no Goberno Municipal dende 2011.

P.- Sr. Lorenzo, facendo alusión directa ao título do relatorio que impartiu o xoves no centro penitenciario de Teixeiro, existe un dereito á xustiza gratuíta?.

R.- Si. Como expliquei na conferencia, é un dereito constitucional recollido nos arts. 24 e 119 da Constitución Española, desenvolvido pola normativa vixente en materia de xustiza gratuíta.

P.- Esta pregunta é manida e recorrente, pero nun curso como o que nos ocupa, é obrigada: ata que punto é gratuíta a xustiza?.

R.- "A xustiza non é gratuíta, porque se financia cos tributos de todos os cidadáns. Distinto é que todas as persoas que acrediten ter insuficientes recursos económicos teñan recoñecido este dereito e polo tanto poidan litigar sen custo para eles, asumindo a Administración o custo de todos os gastos de procedemento e defensa e representación procesual."

P.- Na súa opinión e sen saírnos da gratuidade, Hai colectivos excesivamente protexidos?, por dicilo de xeito entendible para todos.

R.- "Non hai colectivos especialmente protexidos, senón que hai colectivos que polas súas circunstancias económicas e/ou persoais non poden custearse un procedemento, pero que non se lles debe impedir por iso a defensa dos seus intereses e se lles recoñece, como xa dixen, o dereito a un avogado e un procurador de oficio gratuíto para a defensa dos seus intereses. Non obstante, hai un sector da poboación, a chamada "clase media", que ten que asumir integramente os custos dun procedemento (gastos de avogado, procurador, perito, taxas xudiciais...) e que ás veces pola súa economía non pode asumilos pero tampouco ten acceso á xustiza gratuíta, co que penso que en certo xeito se encontran moi desprotexidos na defensa dos seus intereses."

P.- Sr. Lorenzo, é Ud. concelleiro de Servizos Sociais no Concello da Coruña dende o ano 2011. Nos últimos tempos vivimos tempos convulsos e no terreo do seu traballo verao e vivirá con máis intensidade. Que áreas pensa que son as máis deficitarias de tutela xudicial?, dito doutra forma cales son os ámbitos onde a xustiza debería incidir máis?.

R.- "Creo que a Xustiza é un piar fundamental do Estado de dereito e necesita máis medios, ser máis rápida e para iso necesítanse maiores partidas presupostarias, aumentar xulgados, equipos e apostar polas novas tecnoloxías."

P.- Para finalizar, é vostede optimista co actual sistema xudicial?.

R.- "Non é cuestión de optimismo ou pesimismo, creo que todo é mellorable, pero toda modificación debe ir presidida polo principio de mellorar e simplificar a atención aos cidadáns, e sobre todo, salvagardando todas as garantías legais, procurar unha maior celeridade á Xustiza. Os procedementos e as instrucións non poden durar o tempo que están a durar actualmente, e non se poden ter a persoas procesadas durante anos para que finalmente resulten inocentes."

Para calquera cuestión relativa a esta noticia enviar un correo electrónico a comunicacion@a-coruna.uned.es