Prepara os teus exames
9 de enero de 2015
Analiza e procesa os temas de estudo de forma eficaz.
TÉCNICA DO SUBLIÑADO
Este é un proceso que che axudará a destacar o relevante da información que imos lendo, facilita a axilidade de lecturas posteriores e, máis adiante, que che servirán para estruturala e sintetizala.
- Lectura rápida do texto: permíteche ter unha visión global do contido do texto. O obxectivo é comprendelo de forma xenérica, sen detalles.
- Lectura parágrafo a parágrafo: subliñar as palabras clave que representan as ideas principais e as ideas secundarias, así como os detalles de interese. Pódese facer por cores, trazos, etc.
- En caso necesario, xunto a cada parágrafo podes facer anotacións á marxe, en forma de palabra clave, para explicitar aspectos que aínda que non se din abertamente no texto, van resultar útiles para a organización da información nos esquemas.
- Utilizar signos, frechas ou símbolos que axuden a precisar, destacar ou relacionar uns contidos con outros.
- Cando pola súa importancia sexa necesario subliñar varias liñas seguidas, é máis práctico situalas entre corchetes ou paréntese.
Vantaxes desta técnica:
- Desenvolve a capacidade de análise e observación.
- Facilita a comprensión e a estruturación de ideas.
- Obriga a formularnos que é o principal e que é o secundario.
- O estudo faise máis activo; obríganos a fixar máis a atención.
- Facilita o repaso e a relectura rápida do texto.
Erros máis comúns no subliñado:
- Subliñar antes de realizar unha lectura completa; non se apreciará a diferenza de ideas principais e secundarias.
- Subliñar en exceso, non soamente as palabras clave.
TÉCNICA DE SÍNTESE
Vantaxes de sintetizar o texto:
- Aclarar a estrutura do tema entresacando o esencial e o importante.
- Ordenar xerarquicamente as ideas.
- Acoutar a extensión do texto que se debe estudar.
- Facilitar o repaso.
- Determinar con antelación que é o que haberá que poñer no exame e que é o que se pode omitir.
- Facilitar o estudo activo.
Tipos de técnicas de síntese:
1.- Resumo. Facer un resumo consiste en sintetizar a información da forma máis breve posible, utilizando unha linguaxe propia, destacando:
- A idea principal do texto.
- As partes que ten.
- O tema de cada parte.
- As opinións do autor.
- A opinión propia.
Características dun bo resumo:
- Brevidade.
- Claridade.
- Xerarquía.
- Integridade.
2.- Esquema. É a representación xerárquica dun texto.
Características dun bo esquema:
- Brevidade.
- Estrutura: conseguir que se reflicta á primeira vista a estrutura interna de todo o tema, así como as relacións que hai entre as súas partes.
- Simbolismo: empregar, frechas, puntos, recadros, chaves, debuxos alegóricos, palabras claves, etc.
3.- Cadro comparativo
Consiste nun cadro de dobre entrada que permite organizar a información de acordo cuns criterios previamente establecidos. A finalidade principal é establecer as diferenzas entre os conceptos que se tratan.
4.- Mapas conceptuais. Representan as relacións significativas entre conceptos en forma de proposicións. Está considerado como unha das ferramentas principais para facilitar a aprendizaxe significativa: integrar os conceptos nunha estrutura organizativa da información, caracterizada pola xerarquía.
Debemos ter en conta:
- Elección de signos conceptuais clave do texto.
- Busca de conceptos relevantes na estrutura cognitiva.
- Construción de proposicións entre os conceptos que se proporcionan e os conceptos que xa se coñecen (a través dos enlaces).
- Distinción entre os obxectos ou acontecementos concretos e os máis xerais que inclúan estes acontecementos ou obxectos.
Para avaliar un mapa conceptual, analizar:
- Proposicións: a relación entre dous conceptos debe indicarse mediante a liña que os une e a palabra de enlace correspondente.
- Xerarquía: cada un dos conceptos subordinados debe ser máis específico que o concepto que hai debuxado sobre el.
- Conexións cruzadas: deben sinalarse enlaces se existen relacións significativas entre elementos pertencentes a distintas xerarquías conceptuais.
- Exemplos: haberán de facer referencia a acontecementos ou obxectos que sexan concrecións válidas do que designa o termo conceptual.
5.- Fichas e ficheiros. Unha información relativamente breve sobre un concepto específico. Poden ser útiles:
1. Para aclarar conceptos específicos nos temas nos cales non poden facerse esquemas, tales como:
- Glosarios de termos dun ámbito de estudo.
- Fórmulas en ciencias.
- Dicionarios de idiomas.
2. Para recoller información a través dunha busca por múltiples fontes sobre un tema concreto.
6.- Listas de conceptos. Cando non vaiamos requirir unha clasificación destes. Resultan de grande utilidade no repaso daqueles termos dubidosos ou confusos, ademais de que a súa elaboración resulte relativamente áxil.
Máis información aquí.
Fonte: Araceli Sebastián, Belén Besteiros e Mª Fe Sánchez. TÉCNICAS DE ESTUDO. COIE UNED.