Conferencia "A decoración pictórica dun Balneum de Gallaecia: o xacemento romano de Cambre"
Prevista para o próximo 20 de marzo.
María Loira Enríquez, profesora titora da materia de Pehistoria na UNED A Coruña, impartirá, o próximo 20 de marzo a partir das 19:00 horas no salón de actos da sede da UNED na Coruña, a conferencia "A decoración pictórica dun Balneum de Gallaecia: o xacemento romano de Cambre".
Loira comparte un adianto do contido: "A conferencia ten como base un traballo propio sobre os fragmentos de pintura romana achados en Cambre, levado a cabo baixo a dirección da profesora Carmen Guiral, do Departamento de Prehistoria e Arqueoloxía, e publicado baixo a seguinte referencia: LOIRA ENRÍQUEZ, M (2014): "Pinturas murais do xacemento romano de Cambre", Gallaecia, nº 33, pp. 239-256.
O principal obxectivo desta charla é dar a coñecer, en particular aos alumnos de Historia e Historia da Arte, un enclave de interese no noso patrimonio: o xacemento romano de Cambre. A través del profundizarase nos establecementos tipo vila, os espazos termais e os repertorios decorativos en pintura. A escavación arqueolóxica deixou a descuberto estruturas e fragmentos pictóricos do período romano que será analizados e contextualizados ao longo da conferencia. Os escasos restos de pintura romana que puideron chegar ata os nosos días, no ámbito do noroeste, fan que o enclave teña un valor singular".
Esta actividade está organizada pola Delegación de Alumnos da Facultade de Xeografía e Historia UNED A Coruña e é de acceso libre.
---------------------------------------{}-------------------------------------
Síguenos en:
