“Unha das sorpresas máis agradables que me atopei na UNED é a solidariedade que hai entre os compañeiros”
Manuel Salgado Carnero gradouse en Dereito pola UNED no curso académico 2017/18.
Manuel Salgado Carnero é funcionario de carreira desde 1990, desempeñando funcións de auxiliar administrativo, equivalentes ás do Corpo de Auxilio Procesual, na Xustiza Militar (Xulgado Togado e Tribunal Militar) e, desde finais do ano 2005, como Administrativo, equivalentes ao corpo de Tramitación Procesual, na Sección de Executorias do Tribunal Militar Territorial Cuarto da Coruña. No curso académico 2017/18 gradouse en Dereito pola UNED, recibindo o seu diploma o pasado 11 de outubro no Acto Oficial de Apertura do curso académico actual.
Actualmente cursa o Máster Universitario de Avogacía na Universidade dá Coruña (UDC), aínda que non abandonou a UNED, xa que o curso pasado realizou o Ciclo de Mediación no noso Centro e está a finalizar os seus estudos do grao combinado con Ciencias Xurídicas das Administracións Públicas.
Por que decidiches realizar o Grao na UNED?
No ano 2012, decidín matricularme no Grao en Dereito na UNED, porque consideraba que o método de estudo poderíase axustar perfectamente á miña situación persoal e que, ademais, podía ser perfectamente compatible coa miña situación laboral, actuando como factor engadido o feito de ter moi preto de domicilio a sede do Centro Asociado. Ao principio tiña moitas dúbidas entre retomar os meus estudos na Universidade da Coruña ou ben iniciar o camiño na UNED, decidíndome finalmente por esta última opción.
Cales foron os obxectivos iniciais cando te matriculaches por primeira vez? Persoais ou profesionais?
Os motivos foron tanto persoais como profesionais, aínda que creo que tiveron máis peso na decisión, os persoais que os profesionais, xa que tiña unha “espiña cravada” desde a errática decisión tomada en decembro de 1990, cando decidín non continuar cos meus estudos da Licenciatura de Dereito, apenas tres meses despois de inicialos. Como di o refrán: “nunca é tarde se a dicha é boa”, así que, 22 anos despois decidín matricularme na UNED no Grao en Dereito, no curso 2012-2013.
esde o punto de vista profesional tamén me resultou atractivo, dado que son funcionario da Administración Xeral do Estado, actualmente pertencente ao Grupo C1 e, para poder promocionar ao seguinte grupo A2, é necesario dispoñer dun Grao Universitario e que mellor que o Grao en Dereito!
Como describirías o proceso nestes anos de estudo? Sentes que como estudante tiveches unha evolución na túa forma e tempo de traballo e de estudo desde os inicios?
A palabra que mellor definiría o proceso nestes 6 anos de estudo na UNED sería “APAIXONANTE”. Cada día que ía pasando, desde os primeiros días de outubro de 2012, sentíame máis identificado coa UNED, e en especial, co Centro Asociado da Coruña, onde desde o primeiro momento fun tratado con moita profesionalidade, agarimo e respecto, non só por parte dos profesores senón tamén por parte do resto do persoal que presta os seus servizos no mesmo. Fun sentindo como “na miña casa”.
Sentinme, e síntome, moi a gusto no meu centro asociado que, como dicía anteriormente, é xa “a miña casa”. Ademais, debo de dicir que nel traballan extraordinarios profesionais, que están sempre a disposición dos alumnos e de calquera outro usuario que acode a diario para solicitar información ou asistir a calquera actividade que se organiza no mesmo.
Na túa opinión e no plano profesional, que che vai a achegar esta titulación a curto e medio prazo?
Como dicía anteriormente, no plano profesional, esta titulación vai achegar a posibilidade de promocionar ao grupo A2 (Xestión do Estado), o cal non sería posible sen estar en posesión do título de Graduado; pero, ademais, e o que é máis importante se cabe, achégame grandes coñecementos en Dereito que antes de empezar o grao non tiña e que podo aplicar no meu posto de traballo como funcionario público e que, sen dúbida, redundará nun mellor e máis eficaz servizo aos cidadáns.
Como viviu a túa contorna estes anos de estudo? Tiveches que sacrificar tempo, renuncias...?
A este respecto teño que dicir que atopei sempre apoio total na miña parella, e a pesar de que efectivamente tiven que renunciar a algunhas cousas, a fin de sacar tempo para dedicar ao estudo, creo que mereceu a pena. Gustaríame neste sentido ter un recordo moi especial para o meu pai e o meu sogro, que faleceron ao pouco tempo de iniciar os meus estudos na UNED, así como para a miña nai, que a pesar de non poder coñecer a realidade debido á enfermidade que padece, deume forzas para lograr o meu obxectivo. Non teño ningunha dúbida de que todos eles estarán moi orgullosos do que conseguín.
Un pequeno xogo: tres adxectivos positivos e tres non tan positivos do teu paso por esta universidade.
Adxectivos positivos para cualificar o meu paso polo Grao en Dereito na UNED habería moitos máis de tres, sen dúbida, pero a fin de cumprimentar este pequeno xogo, vou elixir estes: “produtivo”, “profesional” e “solidario”, aplicados respectivamente, a este alumno, ao persoal da Universidade e aos compañeiros.
En canto ao primeiro deles, resulta máis que evidente que o meu paso por esta universidade foi, sen dúbida, produtivo, xa que conseguín terminar con éxito o Grao en Dereito e nun prazo máis curto do inicialmente previsto. En canto ao segundo dos adxectivos, “profesional”, elixino para referirme ao persoal que traballa na UNED, non só os membros dos equipos docentes das diferentes materias, senón tamén en canto ao persoal administrativo e colaborador, tanto da Sede Central, como do Centro Asociado da Coruña e, finalmente “solidario”, elixido para referirme ao extraordinario compañeirismo que existe entre os alumnos desta Universidade; sendo, sen dúbida, unha das sorpresas máis agradables, que me atopei na UNED, a solidariedade que hai entre os compañeiros, non só entre os do meu Centro Asociado, senón tamén entre compañeiros doutros centros, cos que contactamos diariamente, a través de distintos foros.
No aspecto negativo téñoo máis difícil, pero considero que si hai aspectos que se poderían mellorar, por exemplo, gravar as titorías en vídeo e que os alumnos matriculados puidesen acceder a elas en calquera momento coas súas correspondentes claves de acceso.
Anímaste a seguir estudando?
Por suposto que seguirei estudando, de feito, nestes momentos estou a facer o Máster Universitario en Avogacía que imparte a Universidade da Coruña en colaboración co Colexio de Avogados e a Escola de Práctica Xurídica, e tamén seguirei estudando na UNED, onde teño pendente de terminar o Grao en Ciencias Xurídicas das Administracións Públicas que levaba combinado co Grao en Dereito e do cal me faltan unicamente 70 créditos para a súa finalización.
--------------------------------------{}-------------------------------------
Síguenos en:
